Bíða lífshættulega lengi eftir aðgerð

Bíða lífshættulega lengi eftir aðgerð

Yfirlæknir segir ástandið á hjarta- og lungnaskurðdeild Landspítalans verra en nokkru sinni fyrr. Bráðveikir sjúklingar bíða mun lengur en öruggt þykir eftir því að komast í aðgerð og dæmi eru um að aðgerð sama sjúklings sé frestað átta sinnum í röð.

 

Að breytast í biðdeild Síðastliðnar vikur hafa fimm sjúklingar sem þurfa í lífsnauðsynlega, opna hjartaaðgerð, beðið á Hjarta- og lungnaskurðdeild Landspítalans. Deildin er ætluð sjúklingum sem eru að jafna sig eftir flóknar skurðarðgerðir en nú virðist hún vera að breytast í biðdeild.

 

Skortur á hjúkrunarfræðingum rót vandans Það er vel hægt að gera aðgerðina. Vandinn er sá að eftir aðgerð þurfa þessir sjúklingar yfirleitt að liggja nokkra daga á gjörgæslu og þar er ekki pláss. Það eru einungis 12 rými á Landspítalanum fyrir alla bráðveika eða slasaða, þau eru yfirleitt full og stífur forgangslisti. „Það bitnar þá mest á valkvæðum aðgerðum eins og þessum hjartaaðgerðum sem með tíð og tíma verða svo eiginlega hálf bráðar eftir því sem sjúklingarnir bíða lengur,“ segir Sigurbergur Kárason, yfirlæknir á gjörgæsludeild Landspítalans við Hringbraut. Það er fyrst og fremst skortur á hjúkrunarfræðingum sem veldur því að ekki er hægt að hafa fleiri rými opin. Þann vanda hefur Sigurbergur áður bent á. 

 

Mynd með færslu
Sigurbergur Kárason
Sumir beðið fimmfalt lengur en æskilegt þykir Sjúklingunum er ekki treyst til að vera heima þar sem veikindi þeirra eru mjög alvarleg. Mælt er með því að sjúklingar í þessari stöðu bíði ekki lengur en í fimm daga eftir aðgerð en sumir úr hópnum hafa beðið í tæpan mánuð.„Þetta er lífshættulegt ástand að þurfa að fara svona langt út fyrir mörkin sem við þurfum að sætta okkur við,“ segir Gunnar Mýrdal Einarsson, yfirlæknir á hjarta- og lungnaskurðdeild Landspítalans.
Öllum aðgerðum frestað Síðastliðin ár hefur færst í aukana að hjartaaðgerðum sé frestað, þetta átti við um þriðjung aðgerða árið 2017. Nú er ástandið margfalt alvarlegra að sögn Gunnars. Upp á síðkastið hafi þurft að fresta öllum aðgerðum, náðst að gera eina aðgerð í viku þó þörf væri á að gera fjórar til fimm.

Mynd með færslu
Gunnar Mýrdal Einarsson.
Aðeins hafi rofað til um helgina, þá hafi náðst að koma þeim tveimur veikustu á tíu manna forgangslista í aðgerð. Það hefur enginn látist á biðlistanum en Gunnar segist óttast um líf sjúklinganna. Sífellt sé verið að fara yfir listann og endurforgangsraða.

 

Hætti að telja Oft liggur ekki fyrir fyrr en að morgni aðgerðardags að enn og aftur þurfi að fresta. „Ég hætti nú að telja þegar ég var búin að tala við sama manninn átta sinnum út af frestun aðgerðar daginn eftir,“ segir Gunnar. Ástandið sé ömurlegt bæði fyrir sjúklinga og starfsfólk.

 

Opið bréf til ráðherra Einn mannanna sem er í þessari stöðu skrifaði heilbrigðisráðherra opið bréf sem birtist í Fréttablaðinu í morgun, þar lýsti hann því hvernig biðin reyndi á hann andlega og líkamlega og hvatti ráðherra til að fara alvarlega yfir stöðuna.

 

Versta ástand í manna minnum Þetta er ekki í fyrsta sinn sem svona ástand skapast á deildinni, en Gunnar segir stöðuna verri en áður. „Við erum búin að leita í sögubókunum og tala við elstu menn frá því hjartaskurðarðgerð byrjaði á spítalanum og það og það er enginn sem man eftir þessu ástandi.“