Heimsleikar líffæraþega 2019

Heimsleikar líffæraþega
Heimsleikar líffæraþega
Hjörtur Lárus Harðarson, frá Samtökum lungnasjúklinga fánaberi

Dagana 17. til 24. ágúst 2019 fara fram heimsleikar líffæraþegar í Newcastle – Gateshead og munu tveir íslenskir keppendur taka þátt að þessu sinni. Þetta eru fjórðu heimsleikarnir sem Íslendingar taka þátt í.

Í fyrsta skiptið árið 2013 voru leikarnir haldnir í Durban í Suður Afríku. Þar tóku þrír Íslendingar þátt og náði Laufey Rut Ármannsdóttir sér í verðlaun í 5 km. götuhlaupi. Björn Magnússon og Kjartan Birgisson tóku þátt í golfi auk þess sem Kjartan keppti í 5 km hlaupi, 100 metra hlaupi ásamt því að taka þátt í badmintonmóti.

Í annað skiptið voru leikarnir haldnir árið 2015 og fór þá Kjartan Birgisson einn til Argentínu, nánar til tekið til Mar del Plata og keppti í golfi.

Í þriðja skiptið voru svo leikarnir haldnir árið 2017 í Malaga á Spáni og aftur fór Kjartan einn og tók þátt í golfi.

Í fjórða skiptið , nú í sumar, eru þeir félagarnir Kjartan Birgisson, frá Hjartaheillum og Hjörtur Lárus Harðarson, frá Samtökum lungnasjúklinga skráðir til leiks í golfi og munu þeir keppa í bæði einstaklings og liðakeppninni.

„Það á að vera áhugi og spenna meðal líffæraþega að fá að taka þátt í þessum leikum og nota tækifærið til að stunda íþróttir eftir ígræðslu“ sögðu þeir félagar við framkvæmdastjóra Hjartaheilla rétt fyrir brottför.

Með þátttöku sinni vilja þeir félagar kynna þennan möguleika, hér á Íslandi, að taka þátt í skemmtilegu íþróttamóti og hitta jafningja sína á þessum vettvangi.

Lög um „ætlað samþykki“ hafa tekið gildi
Þann 1. janúar 2019 tóku gildi á Íslandi ný lög um líffæragjafir svokallað ætlað samþykki til líffæragjafa. Með þessum lögum er gert ráð fyrir að allir Íslendingar séu líffæragjafar nema þeir hafi tekið annað fram sérstaklega.

Þó svo að lög hafi verið samþykkt er fólk hvatt til að taka afstöðu til líffæragjafa og ræða afstöðu sína við nánustu ættingja hver vilja sinn sé til málsins. Verklagið er eftir sem áður þannig að næstu aðstandendur eru alltaf spurðir um vilja viðkomandi og geta slíkar upplýsingar, sem gefnar hafa verið af viðkomandi, ráðið úrslitum um hvort hægt verði að nýta líffærin eða ekki.