Nýjar reglur um hjálpartæki

Heilbrigðis- og tryggingamálaráðherra hefur gefið út tvær nýjar reglugerðir um styrki Tryggingastofnunar ríkisins (TR). Önnur reglugerðin nær til styrkja vegna kaupa á næringarefnum og sérfæði en hin lýtur að styrkjum vegna hjálpartækja. Samkvæmt fréttatilkynningu frá ráðuneytinu felur breytingin á reglugerð um styrki TR til kaupa á næringarefnum og sérfæði í sér lagfæringar sem hafa að markmiði að tryggja betur en áður hnökralausa framkvæmd, að styrkirnir komi þeim til góða sem sannanlega þurfa á þeim að halda og að kostnaður fari ekki úr böndunum.

Ekki er gert ráð fyrir auknum útgjöldum Tryggingastofnunar vegna breytinga á reglugerðinni. Breytingin á reglugerð um styrki TR vegna hjálpartækja felur í sér nokkra rýmkun á rétti þeirra sem þarfnast hjálpartækja, að því er fram kemur í tilkynningu ráðuneytisins, og gert er ráð fyrir um 20 milljóna króna útgjaldaauka á árinu vegna breytinganna. Með reglugerðinni er t.d. þátttaka TR vegna kostnaðar við öndunarmæla aukin og gert er ráð fyrir að hækka mánaðarlegan styrk vegna öryggiskallkerfisþjónustu úr 5.000 kr. í 5.600 kr. og styrkupphæð vegna stofngjalds úr 6.250 kr. í 6.400 kr., en upphæðirnar hafa verið óbreyttar frá 2003. Morgunblaðið 24. janúar 2006

Skildu eftir svar

Netfang þitt verður ekki birt. Nauðsynlegir reitir eru merktir *