Unglingar á Suðurnesjum og í Reykjavík reykja meira en unglingar annars staðar á landinu. Þetta kemur fram í rannsókn á heilsu og lífskjörum barna sem gerð var meðal grunnskólanema nú í vor. Í ljós kom að 16 prósent unglinga á Suðurnesjum reykja daglega en 14,5 prósent ungliga í Reykjavík. Verulega hefur dregið úr reykingum unglinga undanfarin 11 ár. Árið 1995 reykti rúmur fimmtungur unglinga en einungis 12 prósent árið 2006. Lægst er hlutfallið á Norðurlandi vestra en þar reykja aðeins 2,9 prósent unglinga.
Þóroddur Bjarnason, prófessor í félagsfræði við Háskólann á Akureyri, sem stýrði rannsókninni, segir öflugt forvarnarstarf hafa skilað þeim árangri að dregið hafi úr reykingum.
Lýðheilsustöð hefur nú hafið átak gegn því að selja fólki undir 18 ára aldri tóbak í samstarfi við verslanakeðjur í landinu. Veggspjöld hafa verið útbúin með texta þar sem minnt er á að samkvæmt lögum sé bannað að selja tóbak til þeirra sem eru yngri en 18 ára. Ástæða þykir til þess að vekja athygli á þessum lagaákvæðum nú vegna þess að reynslan sýnir að mörg ungmenni nota sumarið til að prófa að reykja. Visir.is föstudaginn 7. júlí 2006