Í dag voru mælingar á vegum SÍBS á Dalvík og síðan í Hrísey. Vel mætt á báðum stöðum, sólin skein í heiði og léttara yfir lestarfólki en var í gær, enda mikill munur á veðri. Systurnar Margrét og Kristín bættust í hópinn og í kvöld Jóhanna og Guðrún. Von er á fleirum á morgun.
Þriðji dagur ferðarinnar rann upp bjartur og fagur. Drifhvít fjöll hið efra, grænar hlíðarnar og litasamspilið og birtan dásamleg.
Systurnar Margrét og Kristín Albertsdætur komu með morgunflugi og fylgdu lestinni í dag. Margrét er félagsráðgjafi SÍBS og Kristín hjúkrunarfræðingur. Á Dalvík var mæling frá kl. 10-13. Þangað mættu nokkrir Ólafsfirðingar og skrifari fékk myndavél sem hann skildi eftir þar í gær.
Pétur fór að finna umboðsmanninn á staðnum, Kristján Ólafsson umboðsmanninn á staðnum og fór með honum í heimsókn á Dalbæ þar sem margvísleg og góð starfsemi fer fram, m.a. er hinn landsfrægi veðurklúbbur þar innan veggja. Líklega hefði verið gott að hitta meðlimi hans í gær. Einnig var skoðuð kirkjan og safnaðarheimilið, fagrar byggingar og mjög praktiskar.
Seinni partinn fórum við svo með ferjunni Sævar út í Hrísey, þar sem mælt var á Brekku. Yfir þrjátíu manns komu, sem telst afar gott og voru heimamenn ánægðir með heimsókn okkar, svo sem hefur verið á öllum þeim stöðum sem við höfum heimsótt. Meðan beðið var eftir ferjunni á Árskógssandi tók Pétur lagið á harmonikuna í veðurblíðunni og Helgi og Kristín tóku nokkur tignarleg valsspor.
Eftir mælingarnar var ljúffengur kvöldverður á Brekku og svo með Sævari til lands á ný. Á leiðinni fór kólnandi og innundir Krossanesi var frost komið í 3 stig á mæli og norðurljósin leiftruðu á himni.
Guðrún Bergmann, starfsmaður Hjartaheilla og formaður Neistans var nú mætt á Akureyri og sömuleiðis Jóhanna Pálsdóttir formaður Samtaka lungnasjúklinga. Það verður því vel skipað á morgun á Glerártorgi enda búist við góðri aðsókn þar.