Niðurstaða um heilsugæsluna í apríl

Í lok apríl mun nefnd á vegum heilbrigðisráðherra, undir forystu Guðjóns Magnússonar, skila tillögum um framtíðarfyrirkomulag á rekstri heilsugæslustöðva höfuðborgarsvæðisins.

 

Nefndin kemur saman í fyrsta sinn næsta þriðjudag, að sögn Hönnu Katrínar Friðriksson, aðstoðarmanns ráðherra. Sagt var frá því í Morgunblaðinu í gær að skv. skýrsludrögum frá því í október væri hægt að spara hundruð milljóna á ári og auka afköst heimilislækna með breytingu á greiðslum ríkisins til heilsugæslustöðva og tengja þær afköstum að hluta. Byggjast skýrsludrögin á samanburði við einkarekna stöð í Salahverfi í Kópavogi.

 

Mikil upplýsingasöfnun hefur farið fram síðan í október, að sögn Hönnu Katrínar, og drögin í raun aðeins hluti af þeim upplýsingum sem nú liggja fyrir. Drögin voru send hlutaðeigandi stofnunum og hagsmunaaðilum til umsagnar. Þó segir hún meginforsendur skýrslunnar ekki hafa breyst síðan í október. Upplýsingaöflunin sé gerð í góðri samvinnu við þá sem starfa á heilsugæslustöðvum og markmiðið sé að tryggja gott starfsumhverfi þeirra sem þar starfa, og að þar verði áfram veitt þjónusta í hæsta gæðaflokki. Engin stefna hafi verið mótuð um hugsanlegar breytingar á rekstri heilsugæslustöðva.

 

Guðmundur Einarsson, forstjóri Heilsugæslunnar á höfuðborgarsvæðinu, segir skýrsludrögin ekki nógu nákvæman samanburð á rekstri heilsugæslustöðva. Heilsugæslan er ein þeirra sem skilað hafa athugasemdum til ráðuneytisins.

 

Aldur íbúanna skiptir máli

„Í fyrsta lagi er ekki verið að bera saman sambærilega hluti að öllu leyti," segir Guðmundur, sem segir heilsugæsluna í Salahverfi ágæta og búa yfir mjög hæfu starfsfólki. „Stöðin í Salahverfi sinnir svæði þar sem meðalaldur íbúa er mjög lágur. Þar er mikið af börnum og ungu fólki, sem yfirleitt kemur með styttri og færri erindi í hvert sinn sem það fer til heimilislæknis. Eftir því sem fólk eldist og meira er af útlendingum í hverfum verða mál gjarnan flóknari og taka lengri tíma. Eldra fólk hefur mörg erindi í hvert skipti og margir útlendingar þurfa túlk. Þetta minnkar afköst lækna hvað fjölda komutíma varðar," segir Guðmundur. Hann telur útkomuna verða aðra ef afköstin séu skoðuð út frá þeim fjölda úrlausna sem fólk fær á heilsufarslegum vandamálum sínum, í stað fjölda komutíma.

 

Kennslustörf taka sinn tíma

Einnig nefnir Guðmundur að ekki sé nægilegt tillit tekið til þeirra kennslustarfa sem heilsugæsla höfuðborgarsvæðisins sinnir í samstarfi við Háskóla Íslands. Þar er hjúkrunar- og læknanemum, kandídötum og heimilislæknum í sérnámi kennt. Þessi kennsla taki mikinn tíma. „Á því ári sem var notað til samanburðar í skýrslunni, þ.e. 2006, var engin slík kennsla á stöðinni í Salahverfi," segir Guðmundur. Hann kveðst ekki gera athugasemdir við að önnur rekstrarform séu mögulega skoðuð fyrir heilsugæsluna. Morgunblaðið föstudaginn 8. febrúar 2008

Skildu eftir svar

Netfang þitt verður ekki birt. Nauðsynlegir reitir eru merktir *