Biðlistar styttast – bið eftir hjartaþræðingu styttist hvað mest

Landlæknisembættið hefur gefið út nýjar tölur um biðlista eftir aðgerðum á sjúkrahúsum hér á landi miðað við 1. júní. Aldrei áður hafa verið gefnar út tölur svo skömmu eftir viðmiðunardagsetninguna. Þá telst einnig markvert að nú sendir St. Jósefsspítali í Hafnarfirði tölur í fyrsta sinn. Skiptir það einkum máli fyrir tvær tegundir biðlistaaðgerða, sem þar eru gerðar í talsvert miklum mæli, annars vegar aðgerðir á augasteini, en hins vegar kvensjúkdómaaðgerðir.

 

Í meðfylgjandi skjali eru nýju tölurnar í aftasta dálki (merkt 06.08), en einnig eru birtar til samanburðar tölur frá febrúar á þessu ári og svo tölur frá júní í fyrra. Við samanburð þarf að hafa í huga að St. Jósefsspítali sendi ekki inn tölur þá.

 

Bið eftir hjartaþræðingu styttist
Athygli vekur að biðlisti vegna hjartaþræðinga hefur styst verulega. Að sögn yfirlæknis á hjartadeild Landspítala má rekja það til nokkuð aukinnar fjárveitingar, sem hefur gert starfsfólki kleift að gera fleiri þræðingar utan dagvinnutíma og skipuleggja betur vinnuna á dagtíma. Frá sama tíma í fyrra hefur sjúklingum á þessum biðlista fækkað út 235 í 184 og þeim sem beðið hafa 3 mánuði eða lengur hefur fækkað um helming eða úr 119 í 61.

 

Meðal annarra biðlista sem halda áfram að styttast má nefna listann á háls-, nef- og eyrnadeild og lista lýtalækningadeildar vegna brjóstaminnkunaraðgerða, en þar er í raun ekki um eiginlegar lýtaaðgerðir að ræða heldur aðgerðir vegna mikilla álagseinkenna sem konur hafa af mjög stórum brjóstum.

 

Eins og áður bíður allstór hópur fólks eftir aðgerð vegna skýs á auga. Nýlega gerði heilbrigðisráðherra samning við augnlæknastofur um þessar aðgerðir, en áhrifa þess er varla farið að gæta á listum sjúkrahúsanna enn sem komið er. Fróðlegt verður að sjá þennan lista við næstu mælingu.

 

Eini biðlistinn sem lengist svo nokkru nemur er vegna gerviliðaaðgerða á hnjám. Fjöldi þessara aðgerða eykst jafnt og þétt. Kemur þar einkum tvennt til. Annars vegar verður fólk æ þyngra og því fylgja aukin álagseinkenni í hnjám og hins vegar verða aðgerðirnar sífellt öruggari þannig að breiðari aldurshópur fer í  slíkar aðgerðir.

 

Matthías Halldórsson
aðstoðarlandlæknir

Skildu eftir svar

Netfang þitt verður ekki birt. Nauðsynlegir reitir eru merktir *