ÞÓTT einungis sé liðið rúmt ár frá innleiðingu reykingabannsins hérlendis virðast hjartalæknar strax farnir að taka eftir jákvæðum áhrifum bannsins á reyklausa gesti veitinga- og skemmtistaða.
21% færri reyklausir karlar þurft á þræðingu að halda.
Sé miðað við fimm mánaða tímabil bæði fyrir og eftir að reykingabannið var sett á í fyrra þurfa 21% færri reyklausir karlmenn á hjartaþræðingu að halda vegna svokallaðs óstöðugs kransæðasjúkdóms.
Athygli vekur að enginn munur er á tíðninni hjá konum, en ástæðan er talin vera sú að konur fá kransæðasjúkdóm 10-20 árum seinna á ævinni en karlar.
Þessar niðurstöður eru í samræmi við það sem komið hefur fram í áþekkum rannsóknum annars staðar, t.d. fækkaði hjartaáföllum í Skotlandi í kjölfar reykingabannsins þar og í mörgum bandarískum rannsóknum hefur reykingabann reynst gefa góða raun. | 20
Í hnotskurn
» Óstöðugur kransæðasjúkdómur er samheiti yfir kransæðastíflu eða alvarlegar þrengingar í kransæðunum sem myndast vegna samspils æðakölkunar og blóðsegamyndunar í æðaholinu.
» Einkennin eru oftast brjóstverkir í hvíld auk þess sem breytingar sjást í blóðprufum og á hjartariti. Morgunblaðið fimmtudaginn 31. júlí 2008