Alþjóðlegi hjartadagurinn 2009 – Vinnum með hjartanu

Hjartadagurinn verður haldinn sunnudaginn 27. september á Hálsatorgi í Kópavogi í samvinnu við Hjartaheill, landssamtök hjartasjúklinga, Neistann, styrktarfélag hjartveikra barna, Kópavogsbæ og Íþrótta- og Ólympíusamband Íslands.

Klukkan 11:00 verður ræst Hjartadagshlaupið þar sem hlaupnir verða 5 og 10 km með tímatöku. Þetta er í þriðja sinn sem hlaupið er haldið og má búast við mikilli þátttöku. Hjartaganga verður í samstarfi við Íþrótta- og Ólympíusamband Íslands sem verður með stafgöngu og leiðsögn í notkun stafa sem allir geta tekið þátt í án þess að skrá sig áður. Stafgangan hefst klukkan 11:15 á sama stað.

 
Þátttaka í viðburðum dagsins er ókeypis.
Hjartavernd hefur einnig gengið til samstarfs við Vinnueftirlitið og mun Bolli Þórsson læknir Hjartaverndar halda opið erindi um tengsl vinnu og hjartasjúkdóma í Odda (stofa 201) frá klukkan 12-13 föstudaginn 25. september á vegum Rannsóknarstofu í vinnuvernd við Háskóla Íslands.

  
Hjartadagurinn er haldinn á heimsvísu síðasta sunnudag í september ár hvert. Markmið hans er að auka vitund og þekkingu almennings á ógnum hjarta- og æðasjúkdóma og leggja áherslu á heilbrigða lífshætti. Hjarta- og æðasjúkdómar eru algengasta dánarorsök alls mannkyns og er Ísland þar engin undantekning þar sem um 700 manns deyja árlega vegna sjúkdóma í blóðrásarkerfi. Á hverju ári falla í valinn í heiminum rúmlega 17.5 milljónir manna og kvenna af völdum hjarta- og æðasjúkdóma. Um það bil 80% af ótímabærum dauðsföllum vegna þeirra mætti koma í veg fyrir ef fólk tileinkaði sér heilbrigðan lífsstíl sem einkenndist af neyslu á hollum mat, hreyfingu við hæfi en ekki síst tóbaksleysi.

Alþjóðahjartasambandið vill benda á hversu mikilvægt sé að beina sjónum að velferð og heilbrigði vinnandi fólks. Flestir Íslendingar verja ríflega helmingi vökustunda í vinnunni og því er tilvalið að ná til fólks á vinnustað. Rannsóknir benda til þess að vinnustaðir sem hvetja til heilbrigðra lífshátta geta dregið verulega úr áhættuþáttum ýmissa sjúkdóma, þar á meðal hjarta- og æðasjúkdóma. Því er inntak hjartadagsins að hvetja alla að „Vinna með hjartanu“ því margt smátt gerir eitt stórt. Með aukinni velferð og heilsuvernd á vinnustað má verulega draga úr kostnaði við sjúkdóma; auka afköst, draga úr sjúkrakostnaði, minnka fjarvistir vegna veikinda, bæta anda og stuðla að jákvæðri ímynd fyrirtækisins. Um helmingur þeirra sem deyja af völdum langvinnra sjúkdóma, þar með talið hjarta- og æðasjúkdóma eru á aldrinum 15 og 69 ára.

Hægt er lesa um Alþjóðahjartadaginn á www.worldheartday.org og á www.hjarta.is.
Nánari upplýsingar gefur Bylgja Valtýsdóttir upplýsingafulltrú í síma 535 1854 eða í gsm 898 9632
Hvernig vinn ég með hjartanu? – nokkrir punktar

 

 Hreyfðu þig á hverjum degi.
 Hreyfðu þig í vinnutímanum eins og þú best getur. Fáðu þér léttan göngutúr um vinnustaðinn eða nánasta umhverfi í hádegismatnum eða kaffitíma og fáðu samstarfsfólk þitt til að gera hið sama.
 Ekki senda töluvupósta til samstarfsfólks, notaðu tækifærið til að hreyfa þig – stattu upp og farðu gangandi til viðkomandi.
 Ekki taka lyftuna milli hæða.
 Leggðu bílnum þínum fjarri inngangi vinnustaðarins.
 Hjólaðu í vinnuna.
 Fræddu samstarfsfólk þitt um kosti þess að hreyfa sig reglulega og hve miklu það skilar sér í bættri heilsu.
 Hjálpaðu öðrum að hefja sín fyrstu skref í heilsueflingu, oft er gott að mynda hópa á vinnustað sem fara saman í gönguferðir.
 Farðu fram á hollan mat í mötuneyti, kaffistofu eða finndu í nágrenni vinnustaðarins matsölustaði sem leggja áherslu á holla rétti.
 Ræddu við forsvarsmenn fyrirtækisins sem þú vinnur hjá um hvernig hægt er að auka velferð á vinnustaðnum. 
 Þegar keyptur er matur er gott að skoða saltinnihaldið og þá er tiltölulega einfalt að finna út hvort maður borðar meira en 5 g á dag. Saltmagn má finna með því að lesa innihaldslýsinguna:
 Hátt saltinnihald telst vera þegar meira en 1,5g salts er í hverjum 100g (eða 0,6g af sodium)
 Lítið saltinnihald telst vera þegar 0,3g eða minna magn eru í hverjum 100g (eða 0,1g sodium)

Skildu eftir svar

Netfang þitt verður ekki birt. Nauðsynlegir reitir eru merktir *