Formannafundur Hjartaheilla, landssamtaka hjartasjúklinga, haldinn að Sólheimum í Grímsnesi 16. október 2010, varar sterklega við hugmyndum um að hætta hjartaaðgerðum á Íslandi og flytja þær til útlanda á ný.
Aðal baráttumál Hjartaheilla, þegar samtökin voru stofnuð fyrir nær 30 árum, var að berjast fyrir því að hjartaaðgerðir færu fram á Íslandi. Það meginmarkmið samtakanna náði fram að ganga og í nær aldarfjórðung hafa hjartaaðgerðir farið fram á hér á Landspítalanum (LSH) með góðum árangri, þökk sé frábæru starfsfólki íslenskarar heilbrigðisþjónustu.
Það væri því gríðarlegt áfall og skref afturábak um þrjá áratugi að hætta hjartaaðgerðum á Íslandi. Öllum má vera ljóst að slíku fyrirkomulagi fylgir ekki aðeins stóraukinn kostnaður fyrir þjóðfélagið í heild heldur einnig áhyggjur, fyrirhöfn og kostnaður hjartasjúklinga og aðstandenda þeirra.
Formannafundur Hjartaheilla skorar því á heilbrigðisráðherra, ríkisstjórn og Alþingi að treysta fjárhagslega stöðu LSH þannig að tryggt verði að hjartaaðgerðir verði áfram framkvæmdar hér á landi.
F.h. Hjartaheilla,
Guðmundur Bjarnason, formaður
Sveinn Guðmundsson, varaformaður og fundarstjóri
Ásgeir Þór Árnason, framkvæmdastjóri og fundarritari