Mjöll Jónsdóttir sálfræðingur hefur hafið störf í Hjartamiðstöðinni og mun þar bjóða hjartasjúklingum og mökum þeirra upp á alhliða sálfræðiþjónustu. Þar verður nú hægt að sækja stuðning og ráðgjöf í baráttunni við sjúkdóminn, breytingarnar, kvíðann og allt sem takast þarf á við eftir eigin veikindi eða veikindi maka.Sálrænn stuðningur og meðferð getur skipt sköpum, ekki bara fyrir almenna líðan eftir veikindi heldur einnig fyrir líkamlegan bata. Þá er líðan maka og það hvernig pör takast saman á við veikindi einnig mikilvægur þáttur í bataferlinu og fyrir framtíðar lífsgæði.
Þjónustan er ætluð öllum þeim sem kljást við hjartasjúkdóma en er ekki einskorðuð við þá sem sækja læknaþjónustu til hjartalækna Hjartamiðstöðvarinnar. Sjúklingar utan Höfuðborgarsvæðisins geta einnig haft samband og spurst fyrir um væntanlega þjónustu í sinni heimabyggð.
Mjöll er með cand. psych. gráðu í sálfræði frá Háskólanum í Árósum í Danmörku en hún hefur í námi sínu og starfi lagt sérstaka áherslu á heilsusálfræði, kvíða og sálrænar afleiðingar hjartasjúkdóma fyrir bæði sjúklinginn og makann ásamt áhrifum sjúkdómsins á samband hjóna, samskipti og árangur í að breyta lífsstíl.
Þjónustan fer fram í Hjartamiðstöðinni sem er til húsa í Hjartaverndarhúsinu í Kópavogi að Holtasmára 1, 6. hæð. Nánari upplýsingar og tímapantanir fara fram hjá ritara Hjartamiðstöðvarinnar í síma 5503030 eða á netfanginu mjoll@hjartamidstodin.is www.hjartamidstodin.is