Góður vinur, traustur félagi og samstarfsmaður er látinn – hinsta kveðja frá stjórn og starfsmönnum Hjartaheilla.
Í dag, 5. ágúst, kveðjum við góðan vin og félaga, Vilhjálm B. Vilhjálmsson, fyrrverandi formann Hjartaheilla og Félags hjartasjúklinga á höfuðborgarsvæðinu.
Fyrir Hjartaheill, landssamtök hjartasjúklinga, var ómetanlegt að fá mann eins og Vilhjálm til liðs við samtökin, hin mikla reynsla hans á sviði félagsmála kom sér afar vel. Vilhjálmur var mikill baráttumaður og lagði sig allan fram um að ná góðum árangri í öllum þeim málum sem hann tók sér fyrir hendur. Það var sérlega gott að leita til Vilhjálms og það var afar gott að starfa með honum. Hann sá hlutina oft í nýjum búningi en virti ávallt skoðanir samstarfsmanna sinna.
Vilhjálmur var alla tíð mikill félagsmálamaður, starfaði með og veitti mörgum félagasamtökum forystu. Hann sat í stjórn Öryrkjabandalags Íslands frá 1981 til 1986 þar af formaður 1983 til 1986. Formaður Hjartaheilla á höfuðborgarsvæðinu frá 1998 til 2007 og í stjórn Hjartaheilla, landssamtaka hjartasjúklinga frá 1996 og formaður frá árinu 2000 til 2007. Vilhjálmur sat í stjórn SÍBS frá 2000 til 2002 og formaður stjórnar Reykjalundar árin 2000 til 2002. Síðustu árin var hann formaður laga- og skipulagsnefndar Hjartaheilla.
Vilhjálmur hlaut heiðursmerki Hjartaheilla, landssamtaka hjartasjúklinga, 2. júní 2007 fyrir framlag sitt til samtakanna og fyrir gæfuríkt og óeigingjarnt starf í þágu þeirra.
Hjartaheill, landssamtök hjartasjúklinga, kveðja tryggan félagsmann og þakka Vilhjálmi öll hans störf í þágu samtakanna og senda eiginkonu hans, Guðrúnu Árnadóttur og öðrum aðstandendum innilegrar samúðarkveðjur.
Fyrir hönd stjórnar og starfsmanna Hjartaheilla,
Guðmundur Bjarnason, formaður
Ásgeir Þór Árnason, framkvæmdastjóri