Alþjóðlegur hjartadagur 2015

WHD 2015

WHD 2015

Hjartadagshlaupið og Hjartagangan, sem haldin eru í tilefni alþjóðlega hjartadagsins 29. september, verða sunnudaginn 27. september næstkomandi. Boðið er upp á 5 og 10 km vegalengdir í hlaupinu og er þátttaka ókeypis eins og áður. Hlaupið hefst klukkan 10 og er ræst frá bílaplaninu við Smáraskóla.

 

Hjartagangan hefst klukkan 10 og eiga þátttakendur að mæta á hlaupabrautina á Kópavogsvelli, gengið inn í gegnum stúkuna. Í boði eru tvær göngur. Sú hægari (2-3 km) í umsjón Friðriks Baldurssonar garðyrkjustjóra Kópavogs og sú hraðari (5-6 km) í umsjón Kjartans Birgissonar frá Hjartaheill. Gert er ráð fyrir að göngur taki 1 klukkustund og er þátttaka ókeypis.

 

Alþjóðlegur hjartadagur er haldinn 29. september ár hvert en það er Alþjóðahjartasambandið (World Heart Federation) sem hvetur aðildarfélög sín um allan heim til að halda upp á Hjartadaginn. Á Íslandi sameinast Hjartavernd, Hjartaheill, Neistinn og Heilaheill um að halda daginn.

 

Félögin hafa haldið upp á daginn með Hjartadagshlaupinu og Hjartagöngunni um árabil í samvinnu við Kópavogsbæ sem hefur boðið þátttakendum í sund að hlaupi loknu. Frjálsíþróttadeild Breiðabliks sér um framkvæmd hlaupsins en hlaupaleiðin liggur um Kársnesið.

 

Þema hjartadagsins í ár eru samfélagið og umhverfi einstaklingsins. Heilbrigður lífsstíll er mikilvægasta forvörn gegn hjarta- og æðasjúkdómum. Hver og einn ræður sjálfur mestu um sinn eigin lífsstíl. Mikilvægt er að gera einstaklingnum kleift að haga sínum lífsstíl á sem heilsusamlegastan máta. Umhverfi okkar þar sem við búum, vinnum og iðkum frístundir, getur haft mikil áhrif á getu okkar til að taka réttar ákvarðanir með heilsu okkar í huga. Á síðustu áratugum hefur margt breyst til batnaðar í samfélagi okkar og umhverfi. Okkur hefur verið gert auðveldara að lifa heilsusamlegu lífi, sé áhugi fyrir hendi. Hjólastígar, göngustígar, almenn útivistarsvæði, takmarkanir á reykingum og fleira hafa skilað sér til þjóðarinnar í bættri heilsu. Sérhver hreyfing er mikilvæg fyrir heilsuna. Ekki þarf alltaf mikið til.

 

„Góður daglegur göngutúr á þeim hraða sem hverjum hentar skiptir máli fyrir heilsuna,“ segir Vilmundur Guðnason forstöðulæknir Hjartaverndar. „Lærum að nota það sem í kringum okkur er.“

 

Kópavogsbær hvetur bæði íbúa bæjarins og nágrannasveitarfélaga til þess að nýta sér fjölmörg útivistarsvæði í bænum, hjóla- og göngustíga. „Hjartadagshlaupið og gangan eru gott tækifæri til að stunda hressandi útivist í Kópavogi, þar sem er fjöldi spennandi útivistarsvæða,“ segir Ármann Kr. Ólafsson, bæjarstjóri Kópavogsbæjar.

 

Félögin sem að hlaupinu standa og Kópavogsbær hvetja sem flesta til þess að taka þátt í hlaupinu og Hjartagöngunni og hvetja alla til að klæðast einhverju rauðu þennan dag.

 

Dagskrá sunnudaginn 27. september

• Hjartadagshlaupið – klukkan 10:00 á Kópavogsvelli. Tvær vegalengdir, 5 og 10 km með tímatöku. Vegleg verðlaun eru í boði fyrir efstu sæti, auk útdráttarverðlauna. Skráning er á hlaup.is eða á staðnum, við stúkuna á Kópavogsvelli frá klukkan 09:00. Vegleg verðlaun verða veitt fyrir efstu sæti.

 

• Hjartadagsgangan, mæting á hlaupabrautina kl: 10:00. Gengið inn í gegnum stúkuna. Í boði verða tvær göngur:
 Róleg ganga með leiðsögn/fróðleik ca. 2 – 3 kílómetrar. Umsjón: Friðrik Baldursson, Garðyrkjustjóri Kópavogsbæjar.
 Kraftmeiri ganga án leiðsagnar/fróðleiks 5-6 kílómetrar. Umsjón: Kjartan Birgisson, frá Hjartaheill.

 

• Kynnir: Ármann Kr. Ólafsson bæjarstjóri Kópavogs.
• Solla stirða, Goggi mega og Siggi sæti koma í heimsókn og heilsa upp á börnin.
• Þátttaka ókeypis.
• Þátttakendum boðið í Sundlaug Kópavogs.

 

Hjartasjúkdómar eru fyrirbyggjanlegir og með því að tileinka sér heilbrigðan lífsstíl má seinka sjúkdómnum og jafnvel koma í veg fyrir ótímabær dauðsföll.

 

Hreyfðu þig! Hreyfing þarf ekki að vera ekki bundin við íþróttir eða líkamsrækt og getur verið margs konar, eins og við heimilisstörf, garðvinnu eða einfaldlega að fara út og leika við börnin. Settu þér raunhæf markmið, ekki byrja á því að klífa fjall eða hlaupa maraþon, þú byggir upp þrek og þol smám saman.

 

Borðaðu hollt! Takmarkaðu neyslu á unnum matvörum sem oft innihalda mikinn sykur, salt og mettað fitu. Gerðu holla matinn spennandi fyrir börnin, berðu fram litríkan mat eins og ávexti og grænmeti og láttu þau aðstoða við matargerðina. Leiddu hugann að skammtastærðum, notaðu minni matardiska og leyfðu grænmetinu og ávöxtunum að taka mesta plássið.

 

Segðu NEI við tóbaki! Það er mikilvægt að þú bannir tóbaksnotkun á heimili þínu og gættu þannig að heilbrigði fjölskyldu þinnar. Fræddu börnin þín um skaðsemi tóbaks til að hjálpa þeim að velja líf án tóbaks. Ef þér finnst erfitt að hætta að reykja, leitaðu þér hjálpar.

Skildu eftir svar

Netfang þitt verður ekki birt. Nauðsynlegir reitir eru merktir *