Gleðilegir viðburðir eins og barnsfæðing eða stórsigur hjá upphalds íþróttaliðinu geta valdið hættulegu ástandi sem læknar og vísindamenn hafa nú nefnt „brostið hjarta heilkennið“.
Um er að ræða ástand sem fellur undir Takotsubo heilkennið (TTS), sem felur í sér að hjartavöðvinn missir skyndilega mátt sem veldur því að vinstra hjartahvolfið, sem dælir súrefnisríku blóði um líkamann, blæs óeðlilega mikið út að neðan.
Þetta getur valdið sárum brjóstverk og andnauð, auk þess að geta leitt til hjartaáfalls og jafnvel dauða.
Lengi hefur verið vitað að óvænt tilfinningaáfall, sérstaklega þegar um neikvæða upplifun er að ræða eins og t.d. andlát maka eða heiftarlegt rifrildi, getur valdið hjartaáfalli.
Engar tölufræði upplýsingar hafa hins vegar verið til um þetta og ekki hafði áður verið rannsakað hvort mikil gleði gæti haft sömu áhrif.
Kveikurinn brúðkaup og óvænt kveðjuveisla
Það voru vísindamenn við Háskólasjúkrahúsið í Zurich í Sviss, þær Christian Templin og Jelena Ghadri, sem 2011 tóku að skrásetja möguleg tilfelli TTS og á fimm ára tímabili söfnuðu 25 sjúkrahús í níu löndum upplýsingum um 1.750 möguleg tilfelli Takotsubo heilkennisins.
Templin og Ghadri fengu 16 vísindamenn í lið með sér og komust þau að þeirri niðurstöðu að 485 þessara tilfella mæti rekja til tilfinningauppnáms og að hjá 4% af þessum hópi, eða 20 einstaklingum, hafi kveikurinn verið jákvæð upplifun.
„Við höfum náð að sýna fram á að það eru fleiri þættir en áður var talið sem geta valdið TTS,“ sagði Ghadri við AFP fréttastofuna. „Jákvæðar tilfinningar geta líka haft þessi áhrif.“
Alls fundu þær 20 tilfelli þar sem gleðilegir atburðir voru undanfari TTS, m.a. afmælisveisla, brúðkaup, óvænt kveðjuveisla, sigur uppáhalds rúgbí liðsins og fæðing barnabarns
Svo virðist sem konur á sjötugsaldri séu líklegastar til að fá TTS í kjölfar tilfinningauppnáms, bæði af völdum gleðilegra viðburða og neikvæðra. „Við vitum enn ekki hvað veldur því að konur eru líklegri til að fá Takotsubo heilkennið,“ sagði Ghadri. „En við getum okkur þess til að estrógen geti haft eitthvað með sjúkdóminn að gera.“
Erlent | AFP | 8.3.2016 | 13:06 mbl.is